Viaxe Xixón-Avilés.

VIAXE A AVILÉS.

Nel Carreño, ensín el vértigu los cantiles del antiguu recorríu d’El Tranqueru. Contraste de paisaxes. Mariña en Xibares, Perán y Perlora. Maizales y ocalitales n’El Regueral y San Zabornín. Industria en Veriña, Aboño, Gudín, Tresona y Llaranes. El serviciu, qu’agora ofrez Renfe, ye meyorable, pero prestosu pa quien nun tenga priesa y quiera ver otres vistes ente Xixón y Avilés. Llegada a la villa del Adelantáu al mediudía y visita obligada al vieyu barriu de pescadores de Sabugo. Comida contemplando la ilesia románica de Santu Tomás. Darréu visita a la ilesia catedral de Santu Tomás de Canterbury.

Un día veraniegu, pa tomar el café na terraza del Lord Bayron, al llau del teatru Palaciu Valdés. Por recomendación de Guti, visitamos a la exposición d’Alfonso Zapico, na antigua Escuela de Cerámica. “Las baladas de Zapico”, un recoríu pola obra d’esti autor. Café Budapest, Dublinés (premiu Nacional de de Comic 2012), La balada del Norte, Los puentes de Moscú… y un montón de grafitis orixinales del dibuxante de Blimea, sobre les parés de la sala exposiciones, qu’acompañen d’una manera prestosa, l’itinerariu de la muestra. Mui recomendable.

Un paséu pol Celsius 232. Fantasia, terror y ciencia ficción. Una montonera d’actividaes. Muncha xente mozo participando.

Un descansu nel parque la Ferrara y vuelta pa casa nel Carreño. Avilés siempre merez una visita. Esi “Cadaver del tiempo” que retrataba Javier Maqua en 1988, pa TVE, tién agora otru meyor aspectu.

JAVIER ANTONIO MARINAS

Conocí a Marinas, nel añu 1989 ó 1990. Tenia él entós unos 32 ó 33 años. Yera menuducu, de sorrisa fácil, sincera... pelu castañu y anque yera mozu, la calvera ya antamaba a precupalu. Presentó les sos primeres historietes nesos años, a la revista de comic EL LLAPICERU, qu´espublizábamos los de Conceyu Bable-Xixón. Tenia un dibuxu mui personal, inconfundible, con munchu movimientu y una planificación de les hestories mui cinematográfica. Collaboró d´una manera altruista, coles sos historietes ya illustraciones, hasta los caberos númberos de la revista. Fizo tres portaes, pa los númberos 12, 13 y 14. Al rodiu de la revista, xuntámonos un grupín de xente, qu´amás de collaborar cola mesma, como digo d´una manera altruista, practicábamos un bona y sana amistá. Asina ye que nos años 90, Marianas, en collaboración cola revista EL LLAPICERU, entamó unos alcuentros d´autores asturianos en Grao , con charres y esposiciones, que tenien como marcu incomparable la recuperada Capiella de los Dolores. Marinas yera l´anfitrión, como natural que yera de la villa Moscona, y l´autor de los cartelos qu´anunciaben les xornaes. Ellí xuntámonos, Alberto Álvarez Peña, Ígor Medio Tuya, Javi Rodriguez, Marinas, Ruma, María, Germán García… que dempués de aldericar, n´aquelles entusiastes meses redondes, acabábemos siempre en L´Infiernu, tomando unes botellines de sidre o xintando daqué en casa Pepe el Bueno. Marinas, amás de dibuxante de comics, yera un bon illustrador y diseñador, ganando dellos concursos de carteleria, como´l del Descensu Folklóricu del Nalón o´l de La Regalina. Como illustrador ganó´l Premio Urriellu de Ilustración convocáu por la Conseyería de Cultura, Deportes y Xuventú nes sos ediciones de 1991 y 1992, o´l Premio de Ilustración concedíu pola Universidad Popular de Castuera (Badajoz) Merez tamién mención la so serie illustrada sobre la Monarquía asturiana que fizo pa ediciones Nobel cola coordinación de Javier Rodríguez Muñoz. Amás de na revista EL LLAPICERU, publicó tamién nes revistes Tapón y El Gomeru. Nel 2013 foi´l ganador del Premiu de comic Alfonso Iglesias, qu´entama la Conseyeria de Cultura del Principáu d´Asturies, pola obra HOMES, que espublizó Trabe en 2013. En 1997 asoleyó´l so primer llibru en solitariu, entituláu BALLENAS, una historia en l´Asturies del siglo XVI, al que siguió en 2005 la obra DOMNO, llibru d´historietes de tema históricu centráu nes rebeliones de Gonzalo Peláez. En 2011 fizo PEDRO MENÉNDEZ AVILÉS, otra biografía en historieta que narra la fundación de la primera ciudá d´Estaos Xunios, San Agustín de la Florida. El pasu´l tiempu y la maldita pandemia, fizo que esta vieya amistá fuera a menos nestos caberos años, pero´l so recuerdu y la so bonalidá, quedará pa siempre na mio memoria. Sit tibi terra levis. Lluis Antón González

Carta a los compañeros del INCAR

 

Dempués de 38 años nel Instituto Nacional del Carbón/ Instituto de Ciencia y Tecnología del Carbono, por fin me xubilo. Fueron munchos los cambios n´estos años, hasta´l nome del propiu centru. Nesti periodu de tiempu llegué a conocer a siete directores del centru, cinco presidentes de gobiernu d´España, dos reis, tres papes pero un solu presentaor de Saber y Ganar.

 

Escomencé a trabayar na Batería, a tres turnos. Ellí tuve 16 años nos que participé en más de 3.500 desfornamíentos, que xeneraron más de 16.000 tonelaes de coque y en cientos d´ensayos. Dempués 7 años nel Fornucu de Paré Móvil. Unos 1000 ensayos, amás de cientos de granulometríes y decenes d´ensayos de reactividá de coques hasta que pasé para la Unidá de Análisis, hai catorce años, onde fice miles d´análisis inmediatos y miles de microanálisis de CHNSO.

Esto son númberos, más o menos precisos, datos estadísticos, pero en toos estos años acompañáronme tamién histories, vides, universos… Mundos que diben desapaeciendo, dando pasu a otros en poco espaciu de tiempu y llugar. La Corredoria, que significa “camín de carros” (1) había talleres de carros y xarrés a tutiplén, como´l de Carlos cerque del Instituto, na carretera de Villaperi.

El Molín de La Frera, desafortunadamente desaparecíu, cuala finca, en parte, foi espropiada para costruyir l´INCAR, representaba, col so molín de represa, un auténticu ñiciu del medievu. A pocos metros una planta de coque siderúrxicu, La Batería, esponente de la era industrial, convivieron durante años. Estos universos, tan cercanos al edificiu principal del INCAR, parecíen ensin embargo mui alloñaos. Asína ye que dalgunos de los trabayadoes de la Batería, referíanse a ella como La Fábrica, la mayoría del centru d´investigación vivía d´espaldes a ella. Dientro el Edificio Principal, oficines y llaboratorios y fuera, como la ciudá estramuros, la coquería, que tinía les sos propies rareces y les sos propies normes, aparte del trabayu continuáu a tres turnos, domingos y festivos incluyios. Esta ciudá estramuros golía a naftalina y a gases de destilación de carbón. Yera un golor tan trescaladizu qu´enllenaba la ropa y la piel y la visita de los empleaos de La Bateria al Edificiu resultaba, recuerdo, un daqué violenta. Histories increyíbles y anécdotes un tanto particulares, que necesitaríen otru capítulu aparte y que solo los que vivimos esa época de la coquería, recordamos con cierta señardá.

 

Grupu C de Bateria en 1986

La mayoría de los sos trabayaores, precedíen d´esa Asturies rural, d´esi medíevu tardíu. Equí los nomes de pila yeran sustituidos, en su mayoría por nomatos. El Pichón, El Xarreru, El Chipu, Polvorín, Pichi, Truchu, Jamaro, El Macho, Puntona, Camporrín, Coronu, Sixtón, Yerbines, El Berriacu, El Moli, Manín, Vagancies, El Calvu, Terry, El Flacu, El Cura … a otros los nomaben pol so llugar de orixen o procedencia. Mieres, Biedes, Sama, Vilortera, Luis El Puente,… Completaben esta plantilla Varín, Telvo, Megido, Herminio, Félix, Aurelio, Tonín, José Manuel, Falo, Pedrín, Manolín, Luismi, Cordera, Rodri, Paulo, Dolfo, Castañón, Fonsín y Miguelín. Y sí, hasta el propiu xefe de la unidá, Ramón Álvarez, tinía el so propiu nomatu: Molaza.

En Batería tocóme pasar calores, xelaes, tormentes, nevaes, eclipses de sol y de lluna; ver pasar cometes, estrelles fugaces y el xirar costante de les estaciones. Prestábame subir a la torre de precalentáu, para ver el mundu dende riba. Agora solo queda´l recuerdu, d´esi mundu que s´estinguió y con él un sieglu, el XX y un mileniu de la era cristiana.

La nueva era, la dixital, a la que la mayoría d´eses persones (les que sobrevivieron) les que cambiaron el llabiegu pola fábrica, que pasaren d´esi medievu a la era industrial, ya nun consiguieron enganchase.

 

Unidá d´Análisis en 2006

Veinti años nun ye nada, cantaba Gardel. Cierto. Poco más de veinti años pasaren dende que zarró la Batería y eso que nos parez dalgo ayeno y distante, la xubilación, llegó. Estos caberos años, nel Llaboratoriu de Análisis, puedo dicir que fueron los meyores. Coles prestoses paréntesis pal café, cola parolada ensín llendes. “Ente tanto´l tiempu corría, el so llatíu silenciosu mide cada vez más precipitao la vida, nun podemos aparar nin un momentu, nin siquier pa una mirada p´hacia atrás.¡Apárate!¡Apárate! quisiéremos gritar, pero comprendemos que ye inútil. Too fuxe, los homes, les estaciones, les nubes; y de nada val garrase a les piedres, resistir no alto d´un escollu; los deos cansaos ábrense, los brazos afloxen inertes, arrástranos de nueves el ríu, que parez sele pero qu´enxamás s´apara”(2).

Dalgunos de los compañeros/es de café en 2014

 

 

 

 

 

 

 

 

 

Y esto ye la vida, como dicía Chéjov, nun hai otra. Aunque pienses qu´escomiences una nueva vida, cola xubilación, la rutina de xuro que va absorbete y los problemes de la vida cotidiana impedir ver el mundu dende riba.

Equí dexo los meyores años de la mio vida. Dalgún qu´otru amigu/a y una montonera de recuerdos. Y sí, hai vida más p´allá del Instituto. Túvela siempre y de seguro que más intensa y apasionada.

Salú y un fuerte abrazu pa toos.

Lluis Antón González Fernández

13 de xunu de 2020.

(1) Xosé Lluis Garcia Arias “Toponimia Asturiana. El porqué de los nombres de los nuestros pueblos”.

(2) Dino Buzzati “El desierto de los tártaros”

LA LLÉBANA EL NUESTRU SHANGRI-LA.

La Llébana ye un conxuntu de valles, amuralláos por altos picos y peñes. Los picos d´Europa, Sierra de Peña Sagra y la Peña Prieta de más de 2500 metros d´altor, faen que, no fondero de los valles, gocie d´un microclima cálidu, onde se dan viñes, alcornoques y olivos más propios d´otres llatitudes, un verxel como´l que describía James Hilton en Horizontes Perdíos. L´unicu accesu sin tener que pasar los montes, ye´l desfiladeru de La Hermida, una foz de 21 kilómetros onde´l riu Deva ábrese pasu nel macizu d´Ándara. 

Viniendo de la costa y en pasando el desfiladeru, lo primero qu´atopamos pa poder visitar ye la ilesia mozárabe de Santa Maria de Lebeña. Una xoya arquitectónica con una lleenda perguapa detrás. Sigún cuenten, foi mandada constuyir por D. Alfonso y la so muyer Dª Xusta, condes de La Llébana, nel añu 925, pa guardar nella los restos del Santu Toribiu, pero na búsqueda de los mesmos el conde quedóse ciegu, lo mesmo que los sos criaos, polo que desistió nel enfotu, y  al recuperar la vista donó la ilesia al monasteriu de San Martín de Turieno. Dos árboles milenarios simbolicen la hestoria d´amor de los condes. Un olivu n´honor a ella, pues yera orixinaria del sur, pué que fuxendo de la ocupación árabe, y un texu, árbol míticu de los antiguos cántabros y astures n´honor a él. Cuenten que les raices d´estos árboles milenarios recorren el terrén que los separa hasta entellazase como muestra d´amor de los condes.  El olivu (la muyer) sigue en pié y el texu (el paisanu) morrió hai dos o tres años. Pero según nos cuenta la guia del templu el texu non morrió dafechu. Una rama del mesmu tá en Colunga, guañando de nueves, pa poder ser tresplantada al mesmu llugar. El templu foi construyíu pué que, sobre un llugar sagráu, una llosa con grabaos d´estilu célticu que tuviere durante sieglos oculta por ser considerada como pagana, pué vese agora nel altar.

Lo más impactante d´esta ilesia ye´l so interior, dividíu en doce cuadraos, toos comunicaos ente sí a nun ser los dos compartimentos llaterales , que los dos casos tán separtaos del central por muries zarraes. Na so estructura interna podemos ver una interesante simbiosis ente l´arte visigodu, l´asturianu y la influyencia árabe: a pesar de que´l diseñu básicu correspuende al d´una ilesia cruciforme visigoda, si s´entrara polo que debió ser la entrada orixinal, la muria oeste, la sensación al entrar  seria que tamos nuna basílica asturiana de tres naves, sensación reforzada polos arcos de mediu puntu de los ábsides. La belleza y el silenciu del so interior, tresportanos a un estáu de paz, mui propiu pa la meditación. 

En saliendo de la ilesia, nos empobinamos a Potes, que como´l so propiu topónimu indica ye un pueblu enllenu de pontes, por tar atravesáu pol riu Deva y onde  s´amiesta  casi en metá de la población el riu Quiviesa. Pontes, grandes cases solariegues, soportales y la torre del Infantáu, formen un conxuntu arquitéctónicu importante, nel que se pué disfrutar d´una gastronomía autóctona interesante. El pote o cocíu llebaniegu, fechu de pequeños garbanzos llebaniegos, patates, berces, el compangu del matacíu del chon (chorizu, morciella y tocín), amás de carne ternera y una especie de pantruque que ye un rellenu fechu con miga de pan, güevu, lleche, ayu y perexil. Tou esti cocíu acompañáu d´un bon vinu llebaniegu y de postre un oruxu de Potes, ye combustible suficiente pa faecer a pie dalguna de les munches rutes que nos lleven a la montaña o al santuariu de Santu Toribiu ún de los grandes sitios de peregrinación de la cristiandá.  Situáu nel conceyu de Camaleñu, el

Monasterio de Santu Toribiu de Llébana, ye un manasteriu franciscanu, onde guarden les obres del Beatu de Llébana asina como´l Lignum Crucis, el cachu más grande conocíu de la cruz onde morrió Xesucristo. El monasterio de Santu Toribiu, situáu na cara norte de la xerra de la Viorna, foi´l centru espiritual más importante del Asturorum Regnum (Reinu d´Asturies). El monasteriu ta rodeáu de pequeñes ermites onde´l Santu se recoyía a orar y a meditar.

Destacamos ente toes elles los restos de la Santa Cueva, una piqueña ermita d´estilu asturianu, escondía en metá d´una biesca y cubierta de mofu y onde se-y aprecien al Santu los ánxeles, depués de llargos dies de retiru espiritual.

Nel nuestru particular “Shangri-La”, tamién podemos disfrutar del arte románicu, pa ello tenemos que dinos hasta Santa Maria de Piasca, un antigüu monasterio nel conceyu de Cabezón de Llébana. La ilesia tá formada por tres naves, como ye habitual, pero lo mas destacable de tol conxuntu ye la belleza de les sos portaes, que ye lo que pudimos ver al tar peslláu´l templu. Sobre la portada principal, destaca una piqueña galeria de tres arcos ciegos , el d´enmedio de mediu puntu y los llaterares llobulaos, con tres figures romániques, a los los llaos San Pedro y San Pablo y nel centru La Virxen col Neñu en cuello.

En la Llébana consérvense tamién la mayoria de los horros de tola Cantabria. Mui asemeyaos a los asturianos. Espinama na carretera de Fuente Dé ye´l pueblu que más horros tién, pero tamién podemos velos esviándonos un poco antes al pueblu Mogrovejo. Paga la pena una visita. Una aldea medieval cola so torre señorial y unes guapes vistes de los picos, como una postal, que taba sirviendo naquel momento como escenariu pal rodaxe d´una nueva versión cinematográfica de H.eidi.

Mas p´arriba d´Espinama, al final de la carretera, alcontrámonos con Fuente Dé, nel que hai un Parador Nacional  y el famosu cable pa subir a los picos. El teleféricu, en poco más de tres minutos situate a 1823 metros d´altor. Una subida 753 metros y una baxada de 10º centígrados de temperatura, del verde de de Fuente Dé al mantu blancu de la ñeve primaveral de los picos nestes feches. Dende´l mirador vemos col vértigu l´altura,  tol valle, coles sos biesques de fayes, demientes la ventisca nos refresca la cara. Esto fainos naguar por un bon caldín, nel bar del teleféricu pa calecenos un poco enantes de dar un paseín, pisando la ñeve, poles inmediaciones, eso si, ensín perder de vista l´antena del mirador.

En tola comarca consérvase tovia daqué de la h.abla del asturianu oriental, consideráu por ellos como montañés o cántabru, pero que tá en francu retrocesu pola presión del castellán y el nulu apoyu al mesmu.

Hestoria, gastronomía, ñatura, cultura, relixón y paisaxe únicos, son abondes razones pa visitar la Llébana, un llugar máxicu en metá de los montes.

HELENA TORAÑO. MIRADA PAL NORTE.(*)

Llanes, patria grande de Pin de Pria, de Celso Amieva, de Pablo Ardisana… mira pal norte. Al sur la sierra de Cuera, como un murallón, nun dexa que la vista se pierda más p´allá  del color gris de la borrina y la caliza del cercanu monte. Por embargu ábrese azúl  lluminosu al norte, a la mar Cantábrica camín de les islles britániques. Dicen que dende los cantiles llaniscos óyense  cantar los gallos n´Inglaterra. Quién sabe si dende esos cantiles l´oyíu atentu y la mirada sollerte de la pintora llanisca Helena Toraño escuhó y vio la música y la lluz del camín a recorrer, el camín del norte. Porque d´ellí vien esi movimientu artísticu, ún de los más importantes de la segunda metá del siglu pasáu, el pop.

El pop, lo popular, ye un movimientu urbanu que naz como una necesidá, frente a elitismu de lo clásico,  como una nueva cultura de mases. Ye na música onde esti movimientu llogra los mayores ésitos. Pero no plástico tamién algama un destacáu puestu. En Londres en 1956, el “Independent Group” entamó nel Institutu d´Arte Contemporaniu, la exposición “Esto ye mañana”, con un cartelu fechu pol artista Richard Hamilton, un collage entituláu “¿Qué ye lo que fai que les cases d´agora sean tan diferentes, tan atractives?” onde un musculosu mozu garraba un enorme chupachups  con un lletreru que ponía POP lo que-y daria depués nome al movimientu.

Del pop, pero tamién la música y el cine independiente, de la nouvelle vague, son fontes d´inspiración d´esta moza pintora asturiana.

La figura humana, el collage, los distintos planos, lo onírico, y en dellos casos lo surrealista  aparecen en composiciones como pequeñes histories, pequeñes dramaturxes, enllenes de personaxes reales y de ficción, non faltes d´humor y cierta ironía con interrogantes abiertos pa que l´espectador complete la hestoria. La improvisación, el bocetu lixeru, manda sobre l´acabáu y la meticulisidá, lo que-y da la frescura de lo inmediato. La lluz intensa y los colores planos, la perspectiva, los puntos de fuga (in)posibles de los suelos son dalgunos de los elementos colos que xuega nes sos composiciones. La so obra, a pesar de la so corta edá llogra una coherencia estética, nada corriente pa una artista de la xeneración dixital, d´internet y de les redes sociales, onde l´arte, la creación, ye daqué más que copiar y pegar.

Lluis Antón González.

* Artículu publicáu na revista El Summun.

Xixón Comics (*)

Xixón ye una ciudá dinámica culturalmente, con numberoses asociaciones y grupos de creación artística, posiblemente como productu o consecuencia de la crisi económica que vive la ciudá. Les nueves xeneraciones busquen na música, el teatru o´l comic una salida nun menos utópica que les tradicionales profesiones d´una ciudá industrial.

Asina ye como naz un grupu dibujantes de comic que, anque nun podemos consideralo xeneracional, si tién en común dalgunes coses. Gaspar Meana, Berto Peña, Javi Rodríguez, Germán García, Ígor medio, Israel, Javier Marinas, Ruma, Manuel Sayar, Julio Nieto, y Luis Alberto Huergo comparten, ( a excepción de Javier Marinas) que viven nuna ciudá, Xixón, y polo tanto crecen al rodiu del Salón Internacional de Comic que dirixe Faustino R. Arbesú. Toos ellos publiquen, menos Gaspar Meana, los sos primeros trabayos na revista de comics EL LLAPICERU. Esta publicación axuntarálos en varies ocasiones n´alcuentros cellebraos en Grao y Corvera onde intercambien idees ya inquietues y esponen los sos trabayos. Dientro de lo heteroxenio d´estos creadores si podemos distinguir un subgrupo formáu por Garmán García, Javi Rodríguez, Ígor y Ruma que comparten, amás, dellos proyectos editoriales.

Esti grupu de dibuxantes podemos consideralu el más numberosu y con meyor preparación, de los caberos años, comparten la disgracia de nun ser corespondios con proyectos empresariales asturianos que den salida a esi potencial d´imaxinación. Sólo en dalgunes ocasiones los diarios o pequñes editoriales como Trabe o Llibros del Pexe prestarán dalguna atención. Como si la cultura nun interesara como negociu económicu. Una vegada más, les multinacionales y empreses d´afuera (como ye´l casu de javi Rodríguez y Germán García) serán les qu´esploten esti filón creador.

Esta muestra d´autores de Xixón servirá una vegada más pa reunir los últimos trabayos d´una xente mozo que tovia tién fe nún futuru muncho más prometedor, pal cual ellos siguen dende el so pequeñu o gran estudiu, ellaborando los sos suaños en forma d´historietes.

 Lluis antón González.

(*) De la esposición de comics  nel Atenéu de la Calzada del añu 2000.

Trailer Tíu Antonín PRIMERO