20 AÑOS de la TPA

Al Aldu-La Risión

En xunu de 2007, entamó a emitise'l programa n'asturianu de 10 minutos, Al Aldu, dientro del programa Con dos de azúcar.  Tocóme d'aquella empobinar una estaya de monólogos, entitulada La Risión. Yera un programa modestu, con pocos recursos. Entamó grabándose nún garaxe, con una cámara, un croma de fondu y ensín públicu. Asina con too, conseguimos grabar más de 140 monólogos. Escritos, la mayoría, a costa fecha pal programa. Con un cuasi 40% escritu por muyeres, lo que nun dexa de ser una novedá dientro del monólogu asturianu. 20 autores diferentes. Cristina Muñiz, Carlos Alba, Tante Blanco, Luzdivino Díaz González, Vanesa Peña y Inaciu Galán, son los autores con más monólogos representaos. 12 actrices y 12 actores foron los encargaos n'interpretalos, anque mayoritariamente foron los homes los que más ficieron. Monólogu Modernu, con Tante Blanco, Silvino Torre, Lluis Antón González, Vanessa Peña, Begoña Quirós, Carmen Sandoval, Isabel Friera, Izar Gayo... pero tamién monólogu clásicu con Pin de la Cotolla, El Maestru, Min de les Pieces y Luz Mari del Sol.   Y clásicu-modernu con Carlos Alba “Cellero” y la so variedá de personaxes. El programa valió pa revitalizar esti xéneru tan asturianu como ye’l monólogu, con nuevos monologuistes y nuevos autores.

La Risión ye parte, de la hestoria d’esta televisión, la TPA, qu’entamó fai 20 años, como serviciu públicu, como una ventana abierta pa ver y pa venos los asturianos.

Tengo d’agrecer, fonderamente, a Antón García y a la so productora La Saltadera, que me dieren la oportunidá de facer esti programa y a tolos participantes, tanto intérpretes como autores.

Un recuerdu especial pa dos collacios, grandes de la escena asturiana: Isabel Friera y Silvino Torre. Grandes na escena y fuera d’ella. Siempre, siempre n’alcordanza.

Lluis Antón González.